Rreth Nesh

Shoqata Uskana ShBA është organizatë e themeluar në vitin 2003 nga një grup mërgimtarësh nga Kërçova. Me inciativën e komunitetit Kërçovarë, dhe nën ombrellën e Uskanës, realizojmë aktivitete të ndryshme edukative, humanitare, e argëtuese që kanë për qëllim përforcimin e komunitetit tonë shqiptarë në Amerikë dhe jashtë saj. Që nga viti 2023, Shoqata Uskana është e regjistruar në regjistrat përkatës në SHBA si Organizatë Jo-Qeveritare dhe Jo-Profitabile (501-c)(3).

Fillimisht, grupi themelues u bë bashkë për të mbështetur familjet të cilat pësonin humbje në njerëz, duke i ndihmuar ata me logjistikën e nevojshme për transportimin e të dashurve të tyre për në Kërçovë. Më pas erdhi një frymë e re e cila, përveç rasteve mortore, ndjente nevojën që të organizohen edhe evente gazmore, me ç’rast u themelua Mbrëmja Kërçovare, ku përmes artit, këngës dhe valles, promovohen vlerat kombëtare shqiptare nga rrethi i Kërçovës.

Në vitin 2013, me rastin historik të zgjedhjeve lokale në Kërçovë, një grup intelektualësh iu bashkangjitën Shoqatës, me ç’rast edhe e emëruan në Shoqata Uskana, që është emri i lashtë Ilir i Kërçovës. Për herë të parë Shoqata u themelua si organizatë me statut dhe rregullore pune. Duke konsoliduar punën dhe aktivitetet e saj, Shoqata ndihmoi në rezultatin pozitiv të zgjedhjeve lokale të vitit 2013, duke mobilizuar trupin votues, me ç’rast komuna e Kërçovës për herë të parë pas disa shekujve, u morr nën drejtimin administrativ të Shqiptarëve.

Gjatë mandatit të kësaj kryesie filluan edhe disa aktivitete të tjera, ndër të cilat ishin Kampi Uskana dhe AMA, që në qendër kishin fëmijët dhe lidhjen e tyre me kombin tonë. Duke i konsoliduar aktivitetet ekzistuese, vazhdimisht kërkohej një mënyrë e re për të krijuar evente të reja, gjithnjë duke patur për qëllim që Shqiptarët të cilët jetojnë në Amerikë të takohen më shpesh mes veti, fëmijët të krijojnë miqësi të reja, kurse ata më të moshuarit të kenë mundësi të takohen dhe të çmallen duke kujtuar historitë e tyre të përbashkëta, qoftë nga mërgimi apo nga vendlindja.

Ndërkohë, kryesia që pasoi vazhdoi të njejtat aktivitete, duke inkuadruar aktivitete të reja shoqërore siç janë: Uskana 5K, Ahengu në Anije, Nata e Filmit Shqip, Bursa Uskana, Nënat e Uskanës etj.

Shoqata Uskana funksionon si entitet i konsoliduar juridik dhe vendimet merren në nivel të kryesisë në përputhje me statutin dhe qëllimet fisnike.

Ndihmo popullin tënd

Bëhu pjesë e kësaj përpjekjeje të përbashkët për të ndihmuar vendin tonë. Së bashku të krijojmë një të ardhme më të mirë për Shqiptarët anë e kënd.

Shoqata Uskana është organizatë jofitimprurëse, e regjistruar në regjistrin përkatës në Amerikë (501-c)(3), dhe donacionet te Shoqata Uskana mund të përdoren për të zvogëluar obligimet tatimore në ShBA

Misioni

Shoqata Uskana është organizatë joqeveritare, joftimprurëse e udhëhequr nga një grup vullnetarësh me prejardhje nga Kërçova, të cilët jetojnë dhe veprojnë në Amerikë. Misioni i Shoqatës është që përmes aktiviteteve të ndryshme humanitare dhe edukative të krijojë lidhje dhe miqësi të reja, si dhe të përforcojë lidhjet ekzistuese në mes shqiptarëve që jetojnë në Amerikë. Shoqata poashtu do të ndihmojë në krijimin e lidhjeve të ngushta të shqiptarëve me rrënjët e tyre Kombëtare në Kërçovë dhe në të gjitha viset tjera shqiptare, duke ndihmuar njerëzit në nevojë e duke përkrahur studentët gjatë studimeve universitare. Kështu, të bashkuar do të kemi zë kumbues në botë duke i shërbyer njëri tjetrit dhe kombit njëkohësisht.

Vizioni

Shoqata Uskana do të jetë qendër e bashkimit të shqiptarëve dhe përmes aktiviteteve të ndryshme humanitare dhe edukative do të ndihmojë në krijimin e miqësive që do të zgjasin përjetë. Shoqata do të jetë zëri jehues i diasporës për të unifikuar kombin jashtë kufijve, dhe do të jetë ura lidhëse në mes vendlindjes dhe diasporës në çdo formë të mundshme, sa herë të jetë e nevojshme, me qëllim që ta lejmë kombin dhe popullin tonë në gjendje më të mirë se sa e gjetëm.